АКШда шатдаундан улам миңдеген авиакаттамдар токтотулду

АКШнын транспорт министри Шон Даффи өкмөттүн иши токтоп тургандыгына (шатдаунга) байланыштуу өлкөнүн эң ири 40 аэропортунан учууларды 10 пайызга кыскартуу буйругун берди. Бул тууралуу Reuters агенттиги билдирди.

Даффинин айтымында, мындай чечим коопсуздук маселелеринен улам кабыл алынган. Шатдаундун айынан 13 миң авиадиспетчер жана 50 миң транспорттук коопсуздук кызматкери айлык акысыз иштеп жатат. Натыйжада алардын көпчүлүгү ооруп жатканын айтышып ишке чыкпай жатышат же башка жумуш издешүүдө.

Авиадиспетчерлердин жетишсиздигинен улам шатдаун башталгандан бери он миңдеген рейстер кечигип, 3,2 миллионго жакын жүргүнчү жабыркады.

АКШдагы өкмөттүк шатдаун 1-октябрдан бери уланып, өлкө тарыхындагы эң узакка созулган шатдаун болуп калды. Ар бир жума сайын экономиканын чыгымы 2 миллиард долларга чейин жетүүдө.

Конгресс каржылоо маселесинде демократтар менен республикачылардын саламаттыкты сактоо жана медициналык камсыздандырууга байланышкан чыгымдар боюнча пикир келишпестигинен улам бир пикирге келе албай жатат.