АКШнын мамлекеттик катчысы 2026-жылы Кыргызстанга иш сапар менен келүүнү пландоодо

АКШнын мамлекеттик катчысы Марко Рубио 2026-жылы Борбор Азиядагы беш өлкөгө, тагыраагы, Казакстан, Кыргызстан, Тажикстан, Түркмөнстан жана Өзбекстанга иш сапар менен барууну пландоодо. Бул тууралуу ал АКШнын мамлекеттик департаментинде өткөн кабыл алууда айтты. Иш-чарага аталган өлкөлөрдүн тышкы иштер министрликтеринин өкүлдөрү катышты.

"Мен жеке өзүм келерки жылы сиздерге барууну пландап жатам. Бул, балким, бир аптадан көп мөөнөттөгү сапар болот. Биз бул ишти биргеликте аткарууга тийишпиз", - деди Рубио.

Ал ошондой эле АКШнын жана Борбор Азия өлкөлөрүнүн экономикалык өнүгүү, рынокторго жетүү жана табигый ресурстарды пайдалануу маселелеринде кызыкчылыктары дал келерин баса белгиледи. АКШ бул кызматташтыкты эки тараптуу деңгээлде жана C5+1 форматы боюнча кеңейтүүнү көздөп жатат.

Марко Рубио кошумчалагандай, Борбор Азия узак убакыт бою АКШнын тышкы саясатынын негизги фокусунан тышта калган, бирок учурда бул кырдаал өзгөрүүдө.

"Бул кызыктуу мүмкүнчүлүк. Биздин улуттук кызыкчылыктарыбыз дал келет, өзгөчө экономикалык өсүү жана туруктуу өнүгүү чөйрөсүндө", - деди Рубио.

Эске салсак, C5+1 АКШ менен Борбор Азиянын беш өлкөсүн (Казакстан, Кыргызстан, Тажикстан, Түркмөнстан жана Өзбекстан) бириктирген регионалдык дипломатиялык платформа болуп саналат.