"Сыймыктанасыңар". Оштун мэри Жашылдандыруу ишканасында иштегендердин айлыгы көтөрүлөрүн айтты

Жашылдандыруу ишканасынын кызматкерлеринин айлыгы жаңы жылдан тарта көтөрүлөт. Бул тууралуу Ош шаарынын мэри Жеңишбек Токторбаев "Оштогу көрктөндүрүү жана жашылдандыруу чарба комбинаты” муниципалдык ишканасынын кызматкерлери менен жолуккан учурда айткан.

Анда мэр айлык акыдан тышкары турак жай маселеси да чечиле турганын кошумчалай кеткен.

"Буга чейин Жашылдандыруу ишканасында үч негизги көйгөй бар болчу. Биринчи силердин иштеп жаткан жериңер өтө начар эле. Азыр шаардагы эң кооз, заманбап имарат силердики. "Жашылдандыруу ишканасында иштейм" деп сыймыктанасыңар. Экинчи техникаңар 100 пайыз жаңыланды. Үчүнчү айлык акыңар, бул маселени жаңы жылдан кийин чечип беребиз.

Жетекчиңер айтты, дээрлик баарыңардын 75 пайыз жумушчунун үйү жок экен. Азыр Кең-Сайдан үй баштадык.

Ошол жактан үй берем. Айлыңарды көтөрсөк 20 миң сомдон төлөп, үй ала аласыңар", - деген мэр.

Белгилей кетсек, бүгүн, 6-ноябрда Ош шаарына Өзбекстандан алынып келинген 1000 даана чынар теректин көчөттөрүн отургузуу иштери башталып, ага Оштун мэри катышкан.