Грузияда Саакашвилиге карата кылмыш иши козголду 

Грузиянын мурдагы президенти Михаил Саакашвилиге бийликти басып алууга чакырыктар боюнча айып коюлду. Бул тууралуу чет элдик басылмалар жазышты.

Билдирүүдө белгиленгендей, ишти Георгий Вашадзе, Ника Гварамия, Никанор Мелия, Зураб Гирчи Жапаридзе, Элен Хоштария, Мамуки Хазарадзе жана Бадри Жапаридзе да камтыды. Саясатчылар "диверсия, чет мамлекетке каршы душмандык иш-аракеттерге жардам берүү жана үндөө, Грузия мыйзамдарына жана улуттук коопсуздугуна каршы аракеттерди каржылоо, ошондой эле мамлекеттик түзүлүштү кулатууга чакырыктар" боюнча айыпталууда.

Учурда тергөө уланууда. Окуянын жагдайлары жана себептери такталып жатат.

Михаил Саакашвили 2004-жылдан 2013-жылга чейин Грузиянын президенти болгон. Анын бийликте турган мезгилинде өлкөдө бир топ радикалдуу реформалар жүргүзүлүп, бул реформалар саясий, экономикалык жана социалдык өзгөрүүлөргө алып келген.

Саакашвилинин президенттик доорунда, 2008-жылы Орусия менен аскердик кагылыш болуп, бул согуштан кийин Москва Абхазия менен Түштүк Осетиянын көз карандысыздыгын тааныган. Сырткы саясатта Саакашвили батышчыл багытты карманып, Грузиянын Европа Биримдигине жана НАТОго кошулууга умтуларын ачык билдирип келген.

2013-жылы президенттик мөөнөтү аяктаар алдында Саакашвили Грузиядан чыгып кетип, алгач Европага, андан соң 2014-жылы Украинага көчүп барган. Ал жакта украин жарандыгын алып, грузин жарандыгынан ажыратылган. Украинада президенттин кеңешчиси болуп, 2015-2016-жылдары Одесса облусунун губернатору кызматын аркалаган.

Бирок ал Украинадагы жогорку жетекчилик менен араздашып, 2017-жылы ошол кездеги президент Пётр Порошенконун жарлыгы менен жарандыктан ажыратылган. Саакашвили бир нече жолу камакка алынып, 2018-жылы Польшанын аймагына чыгарылган.

2021-жылы Михаил Саакашвили мекенине кайтып келүүнү чечкен, бирок ал учурда Грузияда ага каршы бир нече кылмыш иши козголгон болчу. Айрым иштер боюнча ал сыртынан айыптуу деп табылып, өкүмдөр чыккан. Мурунку президент бюджеттик каражатты туура эмес бөлүштүрүү, кызмат абалынан кыянаттык менен пайдалануу жана ыйгарым укуктарын ашыра пайдалануу боюнча айыпталган.

Саакашвили чек араны мыйзамсыз жол менен кесип өткөндөн кийин кармалып, камакка алынган. Ал 2021-жылдын 1-октябрынан бери түрмөдө отурат.