Мексика президенти аны кучактап, өпкөнгө аракет кылган адам боюнча билдирүү жасады

Мексика президенти Клаудия Шейнбаумду көчөдө белгисиз эркек кучактап, аны өпкөнгө аракет кылган видео тарады. Бул тууралуу The Guardian жазды.

Маалыматка ылайык, эркек камакка алынган.

Президенттин айтымында, эгер ал өзүнө сексуалдык ыдык көрсөткөн адамга каршы арыз жазбаса, анда ал башка мексикалык аялдар үчүн туура эмес мисал болмок. Шейнбаум ошондой эле мындай нерсе президентке жасалып жатса, өлкөдөгү калган аялдарга эмне болорун сураган.

Учурда шектүү сексуалдык кылмыштарды иликтөө бөлүмүндө камакка алынган. Баштапкы тергөө маалыматтарына ылайык, ошол эле күнү ал башка эки аялга карата да сексуалдык ыдык көрсөтүүгө аракет кылган болушу мүмкүн.

Эске салсак, окуя 4-ноябрда болгон. Шейнбаум көчөдө жарандар менен сүйлөшүп жатканда белгисиз адам артынан келип, аны кучактап, өпкөнгө аракет кылган. Окуянын видеосу социалдык тармактарда тараган.