Масктын компаниясы ага 1 триллион доллар төлөп берет

Tesla компаниясынын акционерлери кечээ, 6-ноябрда компаниянын башкы директору Илон Маскка 1 триллион доллар өлчөмүндөгү компенсациялык пакет төлөп берүүнү колдоп добуш беришти. Бул тууралуу чет элдик басылмалар жазышты.

Түз эфирдин жазмасы компаниянын X социалдык тармагындагы баракчасында жарыяланды.

Бул чечимди акция ээлеринин 75 пайызы колдоду.

28-октябрда Tesla'нын директорлор кеңешинин төрайымы Робин Денхолм акционерлерди Маскка 1 триллион долларлык компенсация төлөөнү колдоого чакырып, эгер бул чечим кабыл алынбаса, Маск компаниядан кетиши мүмкүн экенин эскерткен.

Бул сунуш акционерлер тарабынан 5-ноябрга чейин бекитилиши керек болчу, бирок ага каршы пикирлер да айтылган.

Дүйнөдөгү эң ири консалтинг фирмаларынын бири болгон Institutional Shareholder Services бул сумма "астрономиялык" экенин белгилеп, добуш берүүдө каршы болууга чакырган.

Мындан тышкары бир катар профсоюздар жана корпоративдик байкоочулар Масктын саясий активдүүлүгү компаниянын аброюна зыян келтириши мүмкүн деген жүйө менен бул төлөмгө каршы кампания уюштурушкан.