Мирзиёев Украинадагы конфликтти ким токтото турганын айтты

Өзбекстан президенти Шавкат Мирзиёевдин айтымында, Украинадагы жаңжалды токтото ала турган жалгыз адам АКШнын президенти Дональд Трамп болуп саналат. Бул тууралуу UzNews порталы кабарлады.

"Мен муну сизге Өзбекстанда да айткам, бизде сизди тынчтыктын президенти деп аташат. Сиз сегиз согушту токтотууга жетиштиңиз. Орусия менен Украинанын ортосундагы согушту да токтото ала турган жалгыз адам — бул сиз. Биз буга абдан үмүттөнөбүз", - деди Мирзиёев Трамп менен жолугушуу учурунда.

Өзбек лидери ошондой эле АКШнын президентине "ишенимге негизделген келечекти түзүүгө жардам берип жатканы үчүн" ыраазычылык билдирди.

7-ноябрда Дональд Трамп Украинадагы жаңжалды жөнгө салуу процессинде ийгиликтерге жетишилгенин айткан. Анын айтымында, жакын арада тараптар чечим кабыл алып, тынчтык келишимине кол коюшат.

Вашингтондогу "Евразия борборунун" вице-президенти Эрл Расмуссен белгилегендей, Трамп айрым жаңжалдарды токтоткону менен, айрымдарын тескерисинче күчөтүп жиберген. Анын айтымында, жаңы президент келгенден кийин Израил менен Палестинанын ортосундагы чыңалуу күчөп, Израилдин Иран менен болгон мамилеси да кыйла начарлаган.