Бишкекте самбо боюнча Дүйнө чемпиондугунун ачылышы болду

Министрлер кабинетинин төрагасы Адылбек Касымалиев Бишкек шаарында өтүп жаткан самбо боюнча Дүйнө чемпиондугунун ачылыш аземине катышты. Бул тууралуу өкмөттүн маалымат кызматы кабарлады.

Анда Касымалиев Кыргызстан үчүн мындай масштабдуу эл аралык спорттук иш-чараны өткөрүү чоң сыймык экенин белгилеген.

"Бишкекте дүйнөнүн 73 өлкөсүнөн 659 спортчу ар кайсы континенттердин, маданияттардын жана каада-салттардын өкүлдөрү чогулду. Бул спорт адамдарды бириктирип, чек араларды жоюп, адамзаттын башкы идеалдарын – тынчтыкты, достукту жана өз ара урматтоону ишке ашыра тургандыгынын ачык далили.

Бул чемпиондуктун өзгөчө мааниси бар – ал Кыргызстанда самбонун 60 жылдыгына арналган! Биздин өлкөдө бул спорттун тарыхы 1965-жылы Сергей Жулдыбин анын алгачкы негизин түптөгөндө башталган. Ошондон бери самбо Кыргызстандын спорттук маданиятынын ажырагыс бөлүгү болуп калды", - деген ал.

Өкмөт башчысы бул чемпиондук жогорку деңгээлде өтүп, унутулгус эмоцияларды тартуулап, дүйнөлүк самбонун тарыхында маанилүү окуя болоруна ишенимин билдирген.

"Сиздер өз өлкөлөрүңүздөрдүн сыймыгысыздар, талыкпаган эмгектин, күчтүү рухтун жана жеткилеңдикке умтулуунун үлгүсүсүздөр. Бишкектеги бул күндөр жаркын жеңиштердин, калыс беттештердин убактысы болсун. Ал элдердин ортосундагы достук байланыштарды бекемдеп, тынчтыктын жана спорттук боордоштуктун символу болуп калсын", - деп жыйынтыктаган ал сөзүн.