Президент Садыр Жапаровдун АКШга болгон иш сапары аяктады

Өлкө башчысы Садыр Жапаровдун 5-6-ноябрда АКШга болгон иш сапары аяктады. Бул тууралуу президенттин администрациясы кабарлады.

Маалымдалгандай, сапардын биринчи күнүндө мамлекет башчысы Эндрюс авиабазасына конгон. Экинчи күнү Садыр Жапаров АКШ Сенатынын эл аралык мамилелер боюнча комитетинин башчысы Жеймс Риш жана Конгресстин сенаторлору менен жолугушту. Саясий жана парламенттер аралык кызматташтык маселелери, ошондой эле өлкөлөрдүн соода-экономикалык, инвестициялык чөйрөлөрдөгү өз ара аракеттенүүсү талкууланды.

Андан ары өлкө башчысы АКШнын президенти Дональд Трамп менен Вашингтондогу Ак үйдө сүйлөшүүлөрдү жүргүздү. Лидерлер жогорку деңгээлдеги конструктивдүү диалог өз ара аракеттенүүнүн мындан ары өнүгүшүнө жана биргелешкен демилгелердин ишке ашырылышына өбөлгө түзөрүнө ишеним билдиришкен. Андан соң Борбор Азия мамлекеттеринин башчылары жана АКШнын президенти С5+1 саммитине катышты.

Иш-чаранын алдында Садыр Жапаров басма сөз каражаттары үчүн билдирүү жасады. Ал биргелешкен аракеттер конкреттүү натыйжаларды берерине жана өлкөлөрдүн өз ара пайдасына өбөлгө түзөрүнө ишенимин билдирген. Мамлекет башчысы саммитте сүйлөгөн сөзүндө бул иш-чара айыл чарба, электрондук коммерция, маалыматтык технологиялар, транспорт жана логистика, туризм, банк-финансы чөйрөсү сыяктуу багыттар боюнча кызматташтыкты кеңейтүү үчүн уникалдуу мүмкүнчүлүк берерин белгиледи.

АКШга болгон иш сапарын аяктаган соң Садыр Жапаров кечээ, 7-ноябрда Бишкек шаарына кайтып келди.