"Министрге телефон чалып..." Садыр Жапаров "чексиз тариф" тууралуу түшүндүрмө берди

Өлкө башчысы Садыр Жапаров социалдык тармактагы баракчасы аркылуу билдирүү жасап, электр энергиясындагы "чексиз тарифке" бөгөт коюлганын билдирди.

Президент "чексиз тариф" үч жыл мурун киргизилгенин белгиледи.

"Күз-кыш мезгилинде электр энергиясын керектөөнү өзгөртпөстөн, чектөөсүз колдонууга чакырык жасоо демилгеси “Кыргызстандын улуттук электр тармагы” акционердик коому тарабынан Энергетика министрлиги менен алдын ала макулдашылбастан туруп көтөрүлгөн экен. Бул маселе коомчулукта кеңири талкуу жаратты. Ооба, бул "чектөөсүз тарифи" үч жыл мурун киргизилген, импорттолгон электр энергиясынын баасы менен калкка сатылып жаткан электр энергиясынын баасынын, айырмасын аз болсо да толуктоо үчүн.

Бирок азыркы шартта суунун көлөмү былтыркы жылга салыштырмалуу 2 миллиард куб метрге аз, ошондуктан чектөөсүз тарифке кошулууга бөгөт коюлду. Мен ЖМКдан көрүп дароо эле министрге телефон чалып, катуу айтып бул багыттагы ишти токтотууну жана жарандар үчүн электр энергиясынын бирдей жеткиликтүүлүгүн камсыздоону тапшырдым", - деп жазды мамлекет башчысы.

Буга чейин "Кыргызстан улуттук электр тармагы" ААКсы калкты электр энергиясына болгон "чексиз тарифке" өтүүгө чакырган. Бул өз кезегинде коомчулук тарабынан сынга алынган. Ал арада өлкө башчысы талкуу жараткан чакырыкка байланыштуу энергетика министри Таалайбек Ибраевдин ишин сынга алган.

Кийинчерээк Энергетика министрлиги буга түшүндүрмө берип, "чексиз тариф" демилгесин "Кыргызстандын улуттук электр тармагы" акционердик коому министрлик менен макулдашпастан көтөргөнүн билдирген. Мындан улам үч тешелүү кызматкерлерге чара көрүлгөн.