Филиппинде "Калмаэги" тайфунунан каза тапкандардын саны 224кө жетти  

Филиппинде "Калмаэги" тайфунунун кесепетинен каза болгондордун саны 224кө жетти. Бул тууралуу GMA News телеканалы өлкөнүн Жарандык коргонуу башкармалыгына таянып кабарлады.

Расмий маалыматка ылайык, 109 адам дайынсыз жоголгон, ал эми 500дөн ашык адам жабыркаган.

Себу аралында катуу жаандан улам суу каптоолор болуп, 158 адамдын өлүмү тастыкталды, 74 миңден ашык имаратка зыян келтирилди. Куткаруу жана издөө иштери улантылууда.

Ошондой эле Филиппинде дагы бир тайфун, "Фунг-вонг" тайфуну өлкөнүн түндүк-чыгыш жээгине таасирин тийгизе баштады. Бул тайфундун ылдамдыгы саатына 185 чакырымга жетет. Буга байланыштуу 11 аймактан болжол менен 1 миллион адам эвакуацияланды.

Түндүк аймактарында тайфундун соккусунан коргонуу максатында мектептер жана көптөгөн мамлекеттик мекемелер 10-11-ноябрда жабылат.

Мындан тышкары, 325 ички жана 61 эл аралык рейс токтотулду, ал эми бийлик өкүлдөрү шамалдан улам толкун бийиктиги 3 метрден ашышы мүмкүн экенин эскертишти.

Белгилей кетсек, 2013-жылдын ноябрында Филиппиндерге "Хайян" тайфуну катталып, 7 300дөн ашык адамдын өмүрүн алган.