Токтомат Зулпуевдин 100 жылдык мааракеси Ноокат районунда белгиленди (фото)

Ноокат районунда белгилүү мамлекеттик жана коомдук ишмер Токтомат Зулпуевдин 100 жылдык мааракеси жогорку деңгээлде белгиленди. Бул тууралуу облустук өкүлчүлүктөн билдиришти.

Иш-чарага облус башчысы Элчибек Жантаев, Кыргыз Эл баатыры Миталип Мамытов, маркумдун туугандары, замандаштары жана жергиликтүү тургундар катышты.

Конокторду кире бериштен төкмө акындар салтанаттуу тосуп алышты.

Андан соң улуттук маданиятты чагылдырган кол өнөрчүлүк буюмдары, үй-бүлөлүк турмуш-тиричилик экспонаттары жана уз-чеберлердин иштеринен түзүлгөн көргөзмө көрсөтүлдү.

Иш-чаранын алкагында улуттук спорттук оюндар да уюштурулуп, катышуучулар жана коноктор ордо, алыш бел боо күрөшү жана салбуруун оюндарын көрүштү.

Мааракенин расмий бөлүгүндө Токтомат Зулпуевдин өмүр жолу жана коомдук-саясий ишмердүүлүгү жөнүндө видеоролик көрсөтүлүп, ал тууралуу театрлаштырылган сахналык композиция коюлду. Сөз сүйлөгөндөр Зулпуевдин эл үчүн кылган эмгегин жана жаш муундарга калтырган мурасын белгилешти.

Салтанат белгилүү эстрада ырчыларынын катышуусунда чоң концерт менен жыйынтыкталды.