Ырчы Аваз Акимов аккордеон менен ырдаган балага аспап белек кылды (видео)

Ырчы Аваз Акимов аккордеон менен ырдаган кичинекей балага музыкалык аспап белек кылды. Буга чейин Акимов социалдык тармактагы баракчасына аккордеон менен ырдаган баланын видеосун жүктөп, "Азаматсың иним! Менден сага аккордеон" деп билдирүү калтырган.

Андан кийин аталган видеодогу балага ырчы мырза жолугуп, аккордеон белек кылганын билдирди.

"Жакында бир кичинекей бала аккордеондо ойноп жаткан видеону көрүп, жүрөгүмө жаккан эле. Ошондо эле өзүмө "ушул балага аккордеон белек кылам" деп айткам. Бүгүн ошол бала менен жолугуп, убадамды аткарып, ага жаңы аккордеон белек кылдым. Музыкага болгон сүйүүсүн өчүрбөй, чыгармачылык жолунда алдыга умтулсун деген тилек менен ушул белекти тапшырдым",- деп жазган Акимов.

Ошондой эле Аваз Акимов өзү да кичинекей кезинде аккордеондо ойногонун, ошондуктан бул аспап ал үчүн өзгөчө мааниге ээ экенин жазган.