Касымалиев шайлоого байланыштуу КМШнын Башкы катчысынын биринчи орун басарын кабал алды

Министрлер кабинетинин төрагасы Адылбек Касымалиев Көз карандысыз мамлекеттер шериктештигинин Башкы катчысынын биринчи орун басары Игорь Петришенко менен жолукту. Бул тууралуу президенттик администрациянын маалымат кызматы билдирди.

Жолугушууда тараптар Жогорку Кеңештин депутаттарын мөөнөтүнөн мурда шайлоого байланышкан маселелер боюнча сүйлөшүү жүргүздү. Шайлоодо эл аралык байкоочу катары КМШ байкоочуларынын миссиясы аккредитацияланган, анын башчысы Петришенко.

Касымалиев өлкө президенти – шайлоого ар кандай кийлигишүүнү болтурбай турган эркин, ачык жана таза шайлоо процессин камсыз кылуу боюнча бардык мамлекеттик органдардын алдына так милдетти койгонун айтып, буга байланыштуу Кыргызстан эки тараптуу да, ошондой эле беделдүү эл аралык уюмдар аркылуу да эл аралык байкоочулардын кеңири өкүлчүлүгүн өлкөгө чакырганын билдирди.

Өз кезегинде Петришенко, КМШ миссиясы Кыргызстанда алдыдагы шайлоодо байкоо жүргүзүүдөгү иш алып баруусу тууралуу маалымат берди.