Кыргызстанда түштүк кореялык реалити-шоунун экинчи сезону тартылып бүттү

Кыргызстанда Түштүк Кореянын белгилүү реалити-шоусу "EIDER Chalet'тин" экинчи сезонунун тартуулары аяктады. Бул тууралуу маалыматты Экономика министрлигине караштуу Туризм департаменти билдирди.

Долбоор Кыргызстандын Түштүк Кореядагы элчилигинин жана "K2 Korea Group" компаниясынын колдоосу менен ишке ашкан. Тартуу иштери Чүй жана Ысык-Көл облустарында, ошондой эле Бишкекте өткөн.

Ага 32 түштүк кореялык инфлюенсерлер, тревел-блогерлер жана ырчылар, анын ичинде белгилүү блогер PaniBottle жана мурдагы k-pop жылдызы Квон Ынби катышкан.

Тартылган материалдар YouTube жана Instagram аркылуу жарыяланат. Туризм департаментинин баасы боюнча, бул долбоор Кыргызстанды Түштүк Кореянын аудиториясына таанытууга жана өлкөнүн туристтик имиджин жогорулатууга өбөлгө болот.