Ноокат району дизайн-код боюнча иретке келтирилүүдө

Шаар куруу жана архитектура департаментинин Ноокат райондук башкармалыгы Ноокат райондук мамлекеттик администрациясы менен биргеликте дизайн-коддун талаптарына ылайык аймакты иретке келтирүү иштери жүргүзүлүүдө. Бул тууралуу Курулуш министрлиги кабарлады.

Маалыматка ылайык, дизайн-код архитектура башкармалыгы тарабынан иштелип чыгып, Ноокат райондук мамлекеттик администрациясы тарабынан бекитилген. Учурда райондун борбордук бөлүгүндө жана бир катар аймактарында коомдук имарат, мекеме жана соода жайларынын фасаддарынын сырткы көрүнүшү жаңыртылып, көрнөк-жарнак такталары бирдиктүү үлгүдө орнотулууда.

Дизайн-код-бул райондун архитектуралык көрүнүшүн, көчө-жол тармагын, коомдук жана турак жай объекттерин бирдиктүү стилистикалык багытта өнүктүрүүнү камсыздаган документ. Анын негизги максаты - Ноокат районунун эстетикалык көрүнүшүн жакшыртуу жана жарандар үчүн коопсуз, ыңгайлуу чөйрө түзүү болуп саналат.