Сүлүктүдөгү мектепте айдоочуларды даярдоо курсу ачылды

Жаштардын кесиптик билимин өркүндөтүүгө жана аймакта квалификациялуу айдоочуларды даярдоо максатында Сүлүктү шаарындагы Токтогул атындагы №2 жалпы билим берүү мектебинин базасында автоайдоочулук курсу ишмердүүлүгүн баштады.

Иш-чарага облус башчысы Айбек Шаменов катышып, заманбап талаптарга ылайык жаңыланган окуу класстарынын ишин көрүп чыкты.

Мекеменин унаа токтоочу жайын жана лабораториясын куруу үчүн жергиликтүү бюджеттен 348 миң сом колдоо көрсөтүлгөн. Ошондой эле практикалык сабактар үчүн автоунаа сатып алууга 290 000 сом каражат бөлүнгөн.

Мындан сырткары, демөөрчүлөрдүн колдоосу менен 90 000 сомдук жабдуулар сатылып алынган.

Белгилей кетсек, Токтогул атындагы №2 жалпы билим берүү мектеби министрлер кабинетине караштуу Транспорт каражаттарын жана айдоочулук курамды каттоо боюнча мамлекеттик агенттигинин 12-майында берилген лицензиясынын негизинде расмий түрдө автоайдоочулук курс жүргүзүүгө укук алган.