Казакстандын бийлиги Орусиядан Екатерина Биволду экстрадициялоону суранды

Казакстандын Ички иштер министрлиги мушкер Дмитрий Биволдун жубайы Екатерина Биволду издөө боюнча түшүндүрмө берди. Бул тууралуу казак басылмасы Tengrinews.kz жазды.

Маалыматка ылайык, Ички иштер министринин орун басары Санжар Адилов Екатерина Биволго карата кылмыш иши козголуп, эл аралык издөөгө алынганын билдирген.

"Учурда тергөө иштери уланууда. Биз Орусиянын полициясы менен байланышып жатабыз. Эгер ал кармалса, Башкы прокуратура аркылуу экстрадиция маселесин көтөрөбүз",- деген Адилов.

Буга чейин 31-октябрда Казакстандын Ички иштер министрлиги Екатерина Биволго карата кылмыш иши козголгонун билдирген. Екатерина Биволго Кыргызстан боюнча да издөө жарыяланып, ага карата 330-берене "Расалык, этникалык, улуттук же аймактар ​​аралык кастыкты козутуу" боюнча кылмыш иши козголгон.

Эске салсак, интернет тармагында мушкер Дмитрий Биволдун мурунку аялы Екатерина Биволдун ар кандай улут өкүлдөрүнө карата кемсинткен сөздөрдү айткан видеосу тараган.