Өлкө башчы Таластагы борбордук парктын курулушунун жүрүшү менен таанышты (сүрөттөр)

Бүгүн, 13-ноябрда өлкө башчы Садыр Жапаров Талас шаарындагы борбордук парктын курулушунун жүрүшү менен таанышты. Бул тууралуу президенттин басма сөз кызматы билдирди.

Маалыматка ылайык, мамлекет башчысына жаңыланган шаардык парктын эскизи көрсөтүлгөн. Анын жалпы аянты дээрлик 5 гектарды түзөт.

"Эс алуучулар үчүн ыңгайлуу шарттар түзүлүп, аттракциондор орнотулуп, аймак көрктөндүрүлөт. Паркты реконструкциялоо 17 жылдан бери жүргүзүлгөн эмес, ал эми аттракциондор эскиргендиктен 2008-жылы эле иштебей калган", - деп жазылган маалыматта.

Президенттин Талас облусундагы ыйгарым укуктуу өкүлү Эрмат Жумаев курулуш иштери үстүбүздөгү жылдын июнь айында башталганын белгилеген.

Мындан тышкары Садыр Жапаров Нуржанов атындагы аллеяны реконструкциялоо долбоору менен таанышкан. Аталган аллеяда дүкөндөр, китепкана, эс алуу жайлары, спорттук аянтчалар, фонтандар болот. Ошондой эле аллеяга белгилүү жазуучу Чыңгыз Айтматовдун чыгармачылыгына арналган экспонаттар коюлары жана реконструкциялоону кийинки жылдын июль айында аяктоо пландалып жатканы кошумчаланды.