Франциянын сот органдары Павел Дуровго өлкөдөн чыгууга уруксат беришти

Telegram’дын негиздөөчүсү Павел Дуровдун чет өлкөгө чыгышына тыюу салган жана аны Ницца шаарындагы полиция бөлүмүнө үзгүлтүксүз катталып турууга милдеттендирген чектөө алынды. Бул тууралуу чет элдик басылмалар Франциянын сот органдарына шилтеме берип жазышууда.

Ал сот көзөмөлүнүн алгачкы жеңилдигин быйыл июнь айында алган. Ошол учурда ага жашаган жери болгон Дубайга убактылуу барууга уруксат берилген, бирок ал ар 14 күн сайын Францияга кайтып келип, тергөөчүлөрдү кабардар кылууга милдеттүү болгон.

Сот булактарынын маалыматына караганда, өткөн жыл ичинде 41 жаштагы ишкер сот көзөмөлүнүн бардык шарттарын так аткарган. Дуров үч жолу суракка алынган. Анын адвокаттары бул жагдай боюнча комментарий берүүдөн баш тартканын AFP агенттиги жазды.

Эске салсак, Павел Дуров 2021-жылы Франциянын жарандыгын алган. Ал 2024-жылдын август айынын аягында Ле-Бурже аэропортуна конгондо камакка алынган. Француз бийлиги аны уюшкан кылмыштуулук менен байланышкан бир катар берене боюнча айыптап, Telegram платформасында кылмыштуу мүнөздөгү контенттин жайылышына каршы чара көрбөгөн деп күнөөлөгөн.