"Титаник" кырсыгынан калган алтын чөнтөк сааты аукционго коюлду

"Титаник" кырсыгында каза болгон эң бай жүргүнчүлөрдүн бири Исидор Штрауска таандык 18 караттык алтын чөнтөк сааты 22-ноябрда өтө турган аукциондо 1 миллион фунтка (1 310 000 доллар) чейин сатылышы мүмкүн. Бул тууралуу чет элдик басылмалар жазышты.

Маалым болгондой, Штраус жана жубайы Айда 1912-жылы айсбергге урунуп чөккөн кемеде 1500дөн ашык адам менен кошо көз жумган. Анын сөөгү кырсыктан күндөр өткөн соң табылып, чөнтөгүнөн Jules Jurgensen сааты чыккан.

Аукцион үйү Henry Aldridge & Son саатты "өзгөчө тарыхый эстелик" деп мүнөздөп, чоң кызыгуу жаратып жатканын билдирди. Саат "Титаник" кемеси чөгүп кеткен убакыт - 02:20да токтоп калган абалда табылганы белгиленди. Аукциондо саат менен кошо Айда Штраус кемеде жазган сейрек кат да сатылып, анын 150 миң фунтка (197 000 доллар) бааланышы күтүлүүдө.

Эксперттер бул саат "Титаник" кырсыгына байланыштуу эң баалуу эстеликтердин бири болушу мүмкүн экенин айтышууда. Эске салсак, өткөн жылы Carpathia куткаруу кемесинин капитанына таандык алтын саат 1,56 миллион фунтка (2,07 миллион доллар) сатылып, рекорд койгон.