АКШ семирүү, диабет жана рак оорулары бар жарандарга виза берүүдөн баш тартышы мүмкүн

АКШ өнөкөт ооруларды виза берүүдөн баш тартууга негиз кыла турган жаңы эрежелерди киргизип жатат. Бул тууралуу Washington Post гезити билдирди.

Басылманын маалыматы боюнча, мамлекеттик департамент консулдуктарга жаңыртылган көрсөтмөлөрдү жөнөттү. Бул көрсөтмөлөрдө виза кызматкерлери арыз ээлеринин семирүү, диабет, рак, жүрөк оорулары, өпкө оорулары, нерв системинин оорулары жана психикалык бузулуулар сыяктуу медициналык абалдарына көңүл бурушу керектиги айтылат. Бул диагноздордун баары эми баш тартууга негиз болушу мүмкүн.

Документте АКШда мындай абалдарды дарылоо кымбатка турушу мүмкүн экени баса белгиленет. Эгерде бийлик, жаран өлкө үчүн "каржылык жүк" болуп калышы мүмкүн деп эсептесе, ага виза берүүдөн баш тартылышы мүмкүн.

Мындан тышкары, кызматкерлерге арыз ээсинин жашын, балдарынын санын, улгайган туугандарынын бар экендигин жана үй-бүлө мүчөсүнүн майыптыгын эске алуу сунушталат. Юридикалык эксперттер бул көрсөтмөлөр консулдук кызматкерлерине өтө кеңири эркиндик берет жана баш тартуулардын көбөйүшүнө алып келиши мүмкүн деп эсептешет.

Эксперттер мурда өнөкөт медициналык абалдар, олуттуу инфекциялардан тышкары, мындай оорулар дээрлик эч качан баш тартууга негиз болгон эмес деп белгилешет. Эми кызматкерлерден ар бир арыз ээсинин дарылоосунун потенциалдуу баасын өз алдынча баалоо суралууда.

Айрым америкалык дипломаттар бийлик иммиграцияны мындан ары чектөөгө жана виза системин жайлатууга аракет кылып жатат деп божомолдошууда.