Түштүк Корея АКШдан 25 миллиард долларга аскердик техника сатып алат

Түштүк Корея 2030-жылга чейин АКШдан 25 миллиард долларга аскердик техника сатып алууну пландап жатат. Бул тууралуу Ак үйдүн сайтында маалымдалды.

Маалыматта Сеул өлкөдө жайгашкан америкалык контингентке 33 миллиард доллар өлчөмүндө кеңири жардам көрсөтүү планы менен бөлүшкөнү белгиленет.

Мындан тышкары, Түштүк Корея АКШнын колдоосу менен Түндүк Кореяга каршы биргелешкен коргонууда жетекчилик кылуу үчүн зарыл болгон өзүнүн аскердик мүмкүнчүлүктөрүн чыңдоого багытталган аракеттерди тездетүүгө милдеттенди.

Буга чейин Түштүк Корея АКШ менен соода келишиминин алкагында кеме куруу секторуна 150 миллиард доллар инвестиция сала турганы кабарланган.

30-октябрда президент Дональд Трамп өзүнүн Truth Social социалдык тармагында Түштүк Кореяга атомдук суу астында жүрүүчү кайык курууга уруксат бергенин жазган.

Ошондой эле Трамп Түштүк Корея АКШдан ири көлөмдө мунай жана газ сатып алууга макул болгонун билдирген. Анын айтымында, Сеул Вашингтонго соода бажы төлөмдөрүнүн төмөндөшү үчүн 350 миллиард доллар төлөйт, ал эми бай түштүк кореялык компаниялар менен ишкерлердин АКШ экономикасына салган инвестициялары 600 миллиард доллардан ашат.