Жаш "Ак шумкарлар" Ирандын курамасын 2:1 эсебинде жеңди

Манас шаарында өтүп жаткан Эл аралык "MANAS CUP 2025" турниринин алкагында жаш "Ак шумкарлар" Ирандын курамасын 2:1 эсебинде жеңди. Бул тууралуу Кыргыз футбол биримдигинен билдирди.

Маалым болгондой, кечээ, 15-ноябрда өткөн беттештин биринчи бөлүгү 0:0 эсебинде тең чыгуу менен жыйынтыкталган. Экинчи бөлүктө 1:0 эсебинде ирандындыктар эсеп санын ачып, бирок оюндун акыркы мүнөттөрүндө кыргыз курамасынын оюнчусу Марлен Мурзахматов гол киргизип, эсеп санын теңеди. Ал эми беттешке берилген кошумча мүнөттө кыргыз курмасындагы Саид Дациев өз дараметин көрсөтүп, "Ак шумкарлар" жеңишти камсыздашты.

Белгилей кетсек, "Манас кубогунун" алкагында жаш курама Бахрейнди 2:1 эсебинде уткан. Учурда турнирдик жадыбалда Орусия менен Кыргызстан сап башында келе жатат. Чечүүчү беттеш 18-ноябрда Орусияга каршы болот.

Маалымат үчүн: U-23 курамасы буга чейин Иран менен 2 жолу беттеш өткөргөн. 2014-жылы Азия оюндарында беттеш 1:1 эсебинде, ал эми 2017-жылы Азия кубогуна тандоо оюндарында 2:1 эсебинде ирандыктардын жеңиши менен аяктаган.