Кениядагы "өзгөчө" зебранын сүрөтү тарады

Кениянын Масаи-Мара коругунда кадимки зебралардын арасынан бир зебранын баласы өзгөчөлөнүп турат. Анын аты - Тира, ал дүйнөдөгү биринчи "чекиттүү" зебра болуп саналат. Бул тууралуу чет элдик басылмалар жазышты.

Маалым болгондой, Тиранын териси кара-шоколад түстө жана миңдеген ак тактар менен капталган, кадимки тилкелердин ордуна, түнкү асмандагы жылдыздарды эске салат.

Илимпоздор бул өзгөчөлүктү сейрек кездешүүчү генетикалык мутация - псевдомеланизм менен түшүндүрүшөт. Бул учурда зебранын пигмент клеткалары кадимки тилкелердин ордуна тактар менен же катаал эмес үлгүлөрдү түзөт. Псевдомеланизм зебранын эмбриондук өнүгүүсүнүн эрте стадиясында меланиндин бөлүштүрүлүшүнүн бузулушу менен байланыштуу.

Зебралар үчүн тилкелер жашоодо маанилүү: алар көмүскөдө жашоого, бири-бирин таанууга кызмат кылат. Адистердин айтымында, Тиранын майда чекит түзүлүштөгү белгилери артыкчылык болгону менен өз үйүрүндө жашоо оорчулук жаратып, ага сыноо болушу мүмкүн.