"Кыргызфильм" киностудиясынын фасадына Төлөмүш Океевге арналган мурал орнотулду

"Кыргызфильм" улуттук киностудиясынын административдик имаратынын маңдайкы бетине залкар режиссёр, Кыргыз киносун дүйнөгө тааныткан Төлөмүш Океевдин портрети түшүрүлгөн жаңы мурал орнотулду. Бул тууралуу Маданият, маалымат жана жаштар саясаты министрлигинен билдиришти.

Муралда режиссёрдун образы менен бирге анын улуу кино чыгармаларынан алынган символдук кадрлар чагылдырылды.

"Бул көркөм композиция улуу устаттын чыгармачылык мурасын даңазалап, кийинки муун үчүн руханий дем берүүчү маанилүү көркөм белги катары уюштурулду. Муралды жаратуу демилгеси учурдагы “Кыргызфильм” киностудиясынын директору Максат Жумаевге таандык. Белгилей кетчү жагдай - эмгекти ишке ашырууда мамлекеттик бюджеттен каражат бөлүнгөн эмес. Иш толугу менен жетекчинин жеке каражатынын эсебинен аткарылды",- деп айтылат маалыматта.

Ошондой эле министрлик административдик имараттын фасадын толугу менен жаңылоо, оңдоо иштерин жүргүзүү жана кошумча көрктөндүрүү иш-аракеттери дагы киностудиянын жетекчисинин жеке каржылоосу менен аткарылганын билдирди.