Трамп АКШнын визасын алууда кимдерге артыкчылык берилерин айтты 

АКШнын президенти Дональд Трамп 2026-жылдагы футбол боюнча Дүйнө чемпиондугунун билеттеринин ээлери үчүн тездетилген виза арыздарын кароо аракеттери көрүлүп жатканын билдирди. Бул тууралуу америкалык лидер FIFA өкүлдөрү менен Дүйнөлүк чемпиондукка даярданган жумушчу топтун жыйынында айтканын чет элдик басылмалар жазышууда.

"Дүйнө чемпиондугунун билеттеринин ээлерине маектешүү үчүн артыкчылык берилет. Сураныч, мүмкүн болушунча тезирээк кайрылыңыздар",- деген Трамп.

Ошол эле учурда АКШнын мамлекеттик катчысы Марко Рубио Дүйнө чемпиондугунун билеттеринин ээлерине автоматтык түрдө кирүүгө кепилдик берилбей турганын белгиледи.

"Сиздин билетиңиз виза эмес. Ал АКШга кирүүгө кепилдик бербейт. Бир гана тездетилген маектешүүгө кепилдик берет. Сиз башкалар сыяктуу эле бардык процесстен өтүшүңүз керек",- деген ал.

Чет элдик басылмалардын маалыматына караганда, Дүйнө чемпиондугунун билеттерин АКШдан тышкары жүргөн бир миллионго жакын адам сатып алган.