Казакстандын түштүгүндө өрт чыгып, 12 адам каза болду

Бүгүн, 18-ноябрда эртең менен Казакстандын Жетысай районунун Алгабас айылындагы эки кабаттуу жеке турак үйдөн өрт чыгып, 12 адам каза болду, алардын ичинде 9 бала бар. Бул тууралуу казакстандык басылмалар жазышты.

Түркстан облусунун акими өрттөн жабыркагандардын абалы тууралуу маалымат берди.

Маалыматка ылайык, медицина мекемелерине үч жабырлануучу жеткирилди, эки чоң киши жана бир бала. Алар реанимация бөлүмүндө, абалы оор, бирок туруктуу деп бааланууда. Бейтаптарга интенсивдүү терапия жүргүзүлүп, абалы адистердин көзөмөлүндө.

Өрт кырсыгына байланыштуу өзгөчө режимде иштер жүрүп, облустук саламаттык сактоо мекемелеринен кошумча адистер жөнөтүлүп, медициналык жана психологиялык жардам көрсөтүлүүдө. Президент Касым-Жомарт Токаев каза болгондордун жакындарына көңүл айтып, өкмөт менен облустук бийликке бардык зарыл жардамды көрсөтүүнү жана окуянын себептерин иликтөөнү тапшырды.