УКМК баш аламандыкка чакырган фейк аккаунттун администраторун кармады  

УКМК социалдык тармактарда электр энергиясы жана мигранттар боюнча жалган маалыматтарды таратып, коомчулукту адаштырган анонимдүү аккаунттарды аныктоо боюнча иш жүргүздү.

Натыйжада Instagram жана Threads тармактарында “predator4407” аттуу аккаунтту жүргүзгөн, 1979-жылы туулган А.Д. аттуу жаран кармалды. Ал өлкө сыртындагы деструктивдүү күчтөр менен байланышта болуп, алардын тапшырмасы менен элди массалык баш аламандыкка жана бийликти күч менен басып алууга чакырган постторду жайгаштырып келген.

Ошондой эле ал 20дан ашык фейк аккаунт түзүп, коомчулуктун арасында нааразычылык жаратыш үчүн жаңылыктардын астына атайын чагымчылдык комментарийлерди калтырганы аныкталды.

Бул факт боюнча Кылмыш-жаза кодексинин 278- жана 327-беренелери боюнча кылмыш иши козголуп, А.Д. тергөө абагына камакка алынды.