Казакстанда сасык тумоо күчөп, айрым мектептер аралыктан окууга өттү

Казакстанда бир жума ичинде 183 миң адам курч респиратордук вирус инфекциясына чалдыкты. 2024-2025-жылдагы эпидемиологиялык мезгилдин ушул эле жума көрсөткүчтөрү менен салыштырганда, ооругандардын саны 16 пайызга көбөйгөнүн Казак басылмалары жазышууда.

Саламаттык сактоо министри Акмарал Альназарова быйыл сасык тумоонун активдүү айлануусу 41-жумадан, башкача айтканда, октябрдын биринчи жарымынан тарта башталган. Бул былтыркы ушул күнгө караганда бир аз эрте. Казакстан аймагында буга чейин кездешпеген жаңы сасык тумоо түрлөрү аныкталган эмес. КРВИ жана сасык тумоо белгилери менен кайрылган бейтаптар текшерилип жатат. Республика боюнча риновирус, аденовирус, бокавирус, коронавирус, РС-вирус жана метапневмовирус айланып жатканы байкалууда.

1-сентябрдан бери Казакстанда 1,4 миллион КРВИ учуру катталды.

Казакстанда кош бойлуулар жана балдар үчүн кооптуу болгон гонконг сасык тумоосунун штаммы да аныкталып, 600 бейтап катталган. Массалык ооруларга байланыштуу Чыгыш Казакстан, Абай жана Костанай облустарында айрым мектептерди аралыктан окутуу башталды.