“Парасоциалдык”. Кембридж университети 2025-жылдын сөзүн жарыялады

"Парасоциалдык" деген сөз Кембридж сөздүгүнүн версиясы боюнча 2025-жылдын сөзү болуп жарыяланды. Бул тууралуу университеттин сайтында маалымдалды.

Кембридж университетинин маалыматына караганда, "парасоциалдык" деген сөз адам өзүнө жакын сезген, бирок чындыгында такыр тааныбаган белгилүү адам, китептеги каарман, фильм же сериал каарманы же болбосо жасалма интеллект менен болгон байланыш дегенди билдирет.

Университет сөздүн тандалышын жарандардын белгилүү адамдар, инфлюенсерлер жана жасалма интеллекттин чат-боттору менен түзүп жаткан бир тараптуу эмоционалдык байланышка болгон кызыгуусунун өсүшү менен түшүндүргөн.

Университеттин басма сөз кызматынын түшүндүрмөсүнө ылайык, америкалык ырчы Тейлор Свифттин миллиондогон күйөрмандары анын сүйүү, жүрөк оору жана каалоо тууралуу ырларындагы сөздөр менен өздөрүнүн жеке байланышы бардай сезишкен. Бул көрүнүш "парасоциалдык байланыш" деп аталган түшүнүктүн пайда болушуна алып келген.

"Жасалма интеллекттин боттору менен парасоциалдык мамилелер пайда болгондон бери, адамдар ChatGPT'ге ишенимдүү адамдай, досундай же атүгүл романтикалык өнөктөшүндөй мамиле кыла баштады. Бул айрым учурларда эмоционалдык мааниге ээ, ал тургай тынчсыздануучу нерсе",- деп айтылат макалада.

Ал эми 2025-жылдын сөзү катары англис тилинин Collins сөздүгү "вайбкодинг" (vibe coding) терминин тандады. Бул - программалоонун бир ыкмасы, анда иштеп чыгуучу тапшырманы жана каалаган жыйынтыкты сүрөттөп берет, ал эми коддун негизги бөлүгүн жасалма интеллект түзөт.