Криштиану Роналду Сауд Арабиясынын ханзаадасы менен бирге Ак үйдөгү кечки тамакка катышты (видео) 

Дүйнөлүк футбол жылдызы Криштиану Роналду АКШда Сауд Арабиясынын ханзаадасы Мохаммед бин Салман менен бирге Ак үйдөгү кечки тамакка катышты.

АКШ президенти Дональд Трамп Роналдуну кабыл алуу өзү үчүн чоң урмат экенин белгилеп, футболчу Сауд Арабиясынын модернизациясынын символу болуп калганын айтты.

Роналду 2023-жылдын январынан бери Сауд Арабиясынын "Аль-Наср" клубунда ойнойт. Аталган клуб өлкөнүн PIF инвестициялык фондунa таандык, анын төрагасы мураскер ханзаада Мохаммед бин Салман болуп эсептелет.

Роналду АКШга 2016-жылдан бери бара элек болчу. Буга ошол жылы модель Кэтрин Майорганын футболчуга каршы доо арыз бергени себеп болгон. Ал 2009-жылы Лас-Вегастагы мейманканалардын биринде Роналду тарабынан зордукталганын билдирген. Роналду болсо бул айыптоолорду башынан эле четке кагып келген.

"Мен мага карата айтылган айыптоолорду чечкиндүү түрдө четке кагам. Зордуктоо - менин табиятыма, ишенимиме таптакыр каршы турган жийиркеничтүү кылмыш",- деген Роналду 2018-жылы.

2023-жылдын ноябрында АКШ соту футболчуну толук актап чыккан.