Бишкектин четине курула турчу медициналык шаарчага ооруканалардын баары көчүрүлөбү?

Бишкектеги медициналык шаарчанын курулушун 2026-жылы баштоо пландалууда. Бул тууралуу саламаттык сактоо министри Эркин Чечейбаев "Кабар" агенттигине берген маегинде билдирди.

Анын айтымында, учурда министрлик ар кандай каржылоо булактарын караштырып, түшкөн сунуштарды салыштырып жатат. Ошондой эле ал Бишкектеги бардык ооруканалар медициналык шаарчага көчүрүлбөй турганын айткан.

"Медициналык шаарчага республикалык деңгээлдеги 6-7 гана медициналык мекеме көчүрүлөт. Калган ооруканалар азыркы жайгашкан жеринде ишин улантат. Мисалы, Улуттук онкология борбору, Улуттук хирургиялык борбор, Фучик көчөсүндөгү №1 шаардык оорукана, Жантөшев көчөсүндөгү №2 шаардык оорукана, №3 балдар ооруканасы жана №4 шаардык ооруканадагы травматология бөлүмү өз ордунда калат", - деген министр.

Чечейбаев үй-бүлөлүк медицина борборлору жана үй-бүлөлүк ден соолук борборлору дагы өз ордунда кала берерин кошумчалаган.