Жогорку Кеңештин депутаттыгына талапкер Бактияр Калпаевге айып пул салынды

Бүгүн, 20-ноябрда Борбордук шайлоо комиссиясы №2 шайлоо округундагы Жогорку Кеңештин депутаттыгына талапкер Бактияр Калпаевдин шайлоо өнөктүгүнүн эрежелерин бузгандыгы боюнча арыздар жана билдирүүлөр боюнча жумушчу топтун материалдарын карап чыкты.

БШКнын юристи ырчы Самара Каримова социалдык тармактардагы аккаунттары аркылуу Баткен районундагы бир айылда талапкер Бактияр Калпаев менен шайлоочулардын жолугушуусу болорун жарыялап, (мыйзам тарабынан тыюу салынганына карабай) концерт берерин билдиргенин маалымдады.

Жумушчу топ бул эреже бузуу үчүн Калпаевге 7500 сом айып пул салууну сунуштады.

БШКнын мүчөлөрү жумушчу топ сунуштаган чечимди кабыл алышты.

№2 шайлоо округу: Баткен районунун Кара-Бак, Суу-Башы, Төрт-Гүл жана Алтын-Бешик айылдык муниципалитеттери толугу менен; Айдаркен жана Кадамжай шаарлары жана Кадамжай районунун Актурпак, Молдо-Нияз, Бирлик, Майдан, Орозбеков жана Исхак-Полотхан айылдык муниципалитеттери толугу менен.