Садыр Жапаров менен Путин "тет-а-тет" форматында сүйлөшөт

Орусиянын президенти Владимир Путин 25-27-ноябрда Кыргызстанга мамлекеттик сапар менен келет. Бул маалыматты Орусиянын президентинин жардамчысы Юрий Ушаков тастыктап, сапар президент Садыр Жапаровдун чакыруусу менен уюштурулуп жатканын билдирди.

Анын айтымында, 27-ноябрда Бишкекте ЖККУнун Коопсуздук кеңешинин сессиясы өтөт.

Ушаков сапар 25-ноябрдын кечинде башталарын айтты. Путинди Бишкекке келгенде президент Садыр Жапаров өзү тосуп алып, эки лидер Биринчи Май районундагы Жеңиш аянтындагы Түбөлүк отко гүлчамбар коюшат. Андан кийин президенттер "Ала-Арча" резиденциясында бейрасмий шартта "тет-а-тет" форматында жеке жолугушуу өткөрүшөт.

26-ноябрда Ынтымак Ордо сарайында расмий тосуп алуу аземи болуп, андан соң Кыргызстан-Орусия сүйлөшүүлөрү өтөт. Тараптар саясий, соода-экономикалык, гуманитардык, энергетикалык, билим берүү, саламаттыкты сактоо, миграция жана башка тармактардагы негизги маселелерди талкуулашат. Орусиянын делегациясында бир катар министрлер, мекеме жетекчилери жана ири ишкерлер - Роман Абрамович, Муса Бажаев, Петр Фрадков жана башкалар бар.

Жолугушуунун жыйынтыгында эки президенттин союздаштык жана стратегиялык өнөктөштүктү тереңдетүү боюнча биргелешкен билдирүүгө кол коюшу күтүлүүдө. Ошондой эле өкмөттөр аралык жана коммерциялык мүнөздөгү бир катар келишимдер, жалпы жети документ кабыл алынат. Алар билим берүү, экономика, миграция жана саламаттыкты сактоо сыяктуу тармактарды камтыйт. Документтердин алмашуусунан кийин президенттер расмий билдирүүлөрдү жасап, мамлекеттик кабыл алуу өткөрүлөт.