ЖККУнун кезектеги жыйыны. Бишкекке кимдер келет?

Жамааттык коопсуздук келишим уюмунун кезектеги жыйыны өлкө башчы Садыр Жапаровдун төрагалыгы алдында Бишкек шаарында өткөрүлөт. Бул тууралуу президентинин администрациясынын тышкы саясат бөлүмүнүн башчысы Сагынбек Абдумуталип билдирди.

"Иш-чара 2025-жылдын 26-27-ноябрында Бишкек шаарында өтөт жана ЖККУдагы Кыргызстандын төрагалыгынын жыйынтыктоочу баскычынын негизги окуясы болот",- деген ал.

Сагынбек Абдумуталип жыйынга уюмга мүчө мамлекеттердин башчылары, тагыраагы, Беларустун президенти Александр Лукашенко, Казакстандын лидери Касым-Жомарт Токаев, Орусиянын башчысы Владимир Путин жана Тажикстан мамлекет башчысы Эмомали Рахмон катышарын белгиледи.

"Жыйындын жыйынтыгы боюнча жамааттык коргонуу механизмдерин мындан аркы чыңдоого, мүчө-мамлекеттердин коопсуздук маселелериндеги өз ара аракеттенүүлөрүн өркүндөтүүгө жана аскердик-саясий чөйрөдөгү кызматташтыкты кеңейтүүгө багытталган ондон ашык чечимдерге кол коюу пландаштырылууда",- деп кошумчалаган ал.