Францияда Лувр музейин тоноого шектелген 3 адам кармалды

Франция полициясы Лувр музейиндеги уурулук боюнча дагы үч шектүүнү кармады. Бул тууралуу Le Figaro Париж прокуратурасына таянып билдирди.

Маалыматка караганда, бир эркек жана 31, 40 жаштагы эки аял кармалган.

Буга чейин полиция Париждин четинде Луврдагы уурулук боюнча төртүнчү шектүүнү да кармаган. Шектүү Сен-Сен-Дени департаментиндеги Обервилье шаарында жашайт.

Эске салсак, 19-октябрда белгисиз адамдар жумушчулардын формасын кийип алышып, Лувр музейине киришкен. Алар бир нече мүнөт ичинде Наполеондун коллекциясына таандык жалпы баасы 88 миллион евро болгон зер буюмдарды уурдап кетишкен. Ал эми императрица Евгенияга таандык 1354 бриллиант менен кооздолгон таажы качып бара жаткан учурда жерге түшүп калган. Уурдалган зер буюмдардын айрымдарын шектүүлөр даркнет аркылуу сатууга аракет кылышканы аныкталган.