ФИФА Криштиану Роналдуну бир оюнга четтетти

ФИФАнын Дисциплинардык комитети Ирландия менен болгон беттеште алынган кызыл карточка үчүн Португалия курама командасынын чабуулчусу Криштиану Роналдуну бир оюнга дисквалификациялады. Бул тууралуу Mundo Deportivo жазды.

Маалыматка караганда, Роналду Арменияга каршы өткөн оюнга катышпай калгандыктан, анын дисквалификациясынын мөөнөтү өтүп кеткен.

Роналду — улуттук курама командалар тарыхындагы эң мыкты бомбардир, Европа биринчиликтеринин жана Чемпиондор Лигасынын мыкты оюнчусу. Ал расмий оюндарда 900дөн ашык гол киргизген алгачкы футболчу болуп саналат. Португалиялык чабуулчунун эсебинде Чемпиондор Лигасында беш жеңиш, Евро-2016 чемпиондугунун алтын медалы жана УЕФА Улуттар Лигасынын эки кубогу бар.

Мындан тышкары, Роналду 2006–2022-жылдар аралыгында өткөн беш Дүйнө чемпиондугунда катары менен гол киргизе алган жалгыз футболчу бойдон калууда. Эгер Португалия учурдагы тандоо этабын ийгиликтүү аяктаса, бул цикл Роналдунун Дүйнө чемпиондугунун финалдык баскычына жети жолу катышкан алгачкы футболчу болушуна мүмкүнчүлүк берет.