УКМКнын Тоң райондук бөлүмчөсүнүн жаңы имараты ачылды (сүрөт)

Бүгүн, 27-ноябрда УКМКнын Ысык-Көл облусу боюнча башкармалыгынын Тоң райондук бөлүмчөсүнүн жаңы имаратынын ачылыш аземи болуп өттү.

Аталган иш-чарага УКМК төрагасы Камчыбек Ташиев, облус башчысы Бакытбек Жетигенов, Жергиликтүү өз алдынча башкаруу органдарынын жетекчилиги, УКМК ардагерлери жана башкармалыктын өздүк курамы катышты.

Жаңы имарат толугу менен заманбап техникалар менен жабдылып, аскер кызматкерлеринин улуттук коопсуздуктун кызыкчылыгында жемиштүү иштөөсү үчүн бардык шарттар түзүлгөн. Керектүү байланыштык каражаттар жана тармактык жабдуулар жайгашкан.

УКМК төрагасы Камчыбек Ташиев бөлүмчөнүн кызматкерлерин куттуктап, атайын кызматтардын материалдык-техникалык базасын жакшыртуу боюнча иш-чаралар тынымсыз жүрүп жаткандыгын белгиледи. Мындан улам, кызматкерлердин ишмердүүлүгү таза жана адилеттүү болуусу керек деген талап коюлду. Жемкорлук жана башка мыйзамсыз иштер менен күрөшүү, өзгөчө коопсуздук кызматкерлери арасында катуу көзөмөлгө алынары кошумчаланды.

Иш-чаранын соңунда Ташиев Тоң районунун жергиликтүү тургундары менен жолугуп, алардын көйгөйлөрүн угуп, тийиштүү жетекчилерге тапшырмаларды берди.