Кытайлык илимпоздор тамактын ачуу даамын билүү үчүн жасалма тил ойлоп табышты

Шанхай шаарында Чыгыш-Кытай илим жана технологиялар университетинин илимий тобу тамактын ачуу деңгээлин аныктай алган жасалма тилди сунушташты. Бул тууралуу чет элдик басылмалар жазышты.

Бул түзүлүш кургак сүт, акрил кислотасы жана холин хлоридин аралашмасынан алынган жумшак гелден жасалган. Электр булагына туташтырылганда курамында хлор жана суутек иондору бар гель ток өткөрө баштайт.

Чили калемпиринин ачуу даамын камсыздаган капсаицин сүттөгү белоктор менен реакцияга киргенде гелдин ичиндеги иондордун жүрүшү бузулат да, материалдын электр өткөрүмдүүлүгү төмөндөйт. Дал ушундай физикалык өзгөчөлүк тамактын ачуу даражасын сандык түрдө өлчөө ыкмасынын негизин түзөт.

Сыноо учурунда жасалма тил сегиз түрдүү ачуу азыкты текшерип, ар бирине 0дөн 70ке чейинки көрсөткүч берди. Натыйжалар атайын даярдалган дегустаторлор берген баага дээрлик толук дал келди.

Бул технология тамак-аштын ачуу деңгээлин текшерүүчү портативдүү жабдууларда жана адамга окшош роботторду түзүүдө колдонулары айтылды.