Алматыда “Жамийла” мюзикли көрсөтүлдү 

26-ноябрда Токтогул Сатылганов атындагы Кыргыз улуттук филармониясы Казакстандын Алматы шаарындагы Республика сарайында Чыңгыз Айтматовдун чыгармасынын негизинде даярдалган “Жамийла” мюзиклин тартуулады.

Алгач Алматы шаарындагы Элдер достугу үйүндө казак маданиятына эмгек сиңирген ишмерлерге Эл аралык Айтматов сыйлыгы, ошондой эле Кыргыз Республикасынын Маданият, маалымат жана жаштар саясаты министрлигинин Ардак грамоталары тапшырылды.

Тарыхый маанидеги маданий иш-чарага мамлекеттик катчы Марат Иманкулов жана Казакстандын мамлекеттик кеңешчиси Ерлан Карин катышып, эки өлкөнүн руханий жана маданий мамилелеринин бекемделиши боюнча өз ойлорун билдиришти.

Иш-чарада сөз сүйлөгөн маданият министринин орун басары Аскаралы Мадаминов жана Казакстандын маданият жана маалымат вице-министри Айзада Курманова боордош элдердин маданий-адабий байланышын мындан ары да кеңейтүү маанилүүлүгүн белгилешти.