Андижан шаары 2026-жылдын Түрк дүйнөсүнүн маданий борбору деп жарыяланды (видео)

Кечээ, 28-ноябрда Казакстандын Актау шаарында Түрк маданиятынын эл аралык уюму — ТҮРКСОЙдун туруктуу кеңешинин 42-жыйыны өттү. Жыйын Казакстандын маданият жана маалымат министри Аида Балаеванын төрагалыгы астында өткөндүгүн Кыргызстандын Маданият, маалымат жана жаштар саясаты министрлиги билдирди.

Ага министрдин орун басары Аскаралы Мадаминов катышты. Ал эми ТҮРКСОЙ уюмунун башкы катчысы Султан Раев “Актау 2025-жылы “Түрк дүйнөсүнүн маданий борбору” макамын аркалап, жыл бою түрк дүйнөсүнүн маданият жана искусствосунун башкы аянтчасы болуп келди” деп билдирди.

Жыйында төмөнкү маселелер талкууланды:

• ТҮРКСОЙ уюмунун келерки мезгилдеги ишмердүүлүгү;

• түрк элдеринин орток маданий мурастарын сактоо жана жайылтуу;

• “Түрк дүйнөсүнүн маданий борбору” долбоорунун аткарылышы боюнча отчёт;

• 2027-жылдын маданий борбору болуп тандалуучу шаардын аныкталышы.

Ошондой эле Өзбекстандын Андижан шаары 2026-жылдын Түрк дүйнөсүнүн маданий борбору деп жарыяланды. Мындан тышкары мурда кабыл алынган чечимге ылайык, 2026-жыл түрк дүйнөсүндө Зия Гёкалп жылы деп белгиленери эскерилди. Бул иш-чара түрк дүйнөсүнүн маданий кызматташтыгын тереңдетүүдө маанилүү этап болуп калды.