Шайлоо-2025. Ош облусундагы жалпы 8 округда өнөктүк кызуу жүрүүдө

Ош облусундагы бардык шайлоо тилкелер саат 8:00дө ачылып, ишин баштады. Ош облусунун башчысы Элчибек Жантаев Кара-Суу районундагы №5220 шайлоо тилкесинде атуулдук милдетин аткарып, Жогорку Кеңештин депутаттарын мөөнөтүнөн мурда шайлоого аралыктан добуш берди. Бул тууралуу мекеменин маалымат кыфзматы билдирди.

Ыйгарымдуу өкүл облус тургундарын шайлоо жараянына активдүү катышууга жана өлкөнүн келечегине кайдыгер карабоого чакырды. Ошондой эле бул жолу өлкөдө таза жана ачык шайлоо өткөрүү үчүн бардык шарттар түзүлгөнүн белгиледи.

"Жергиликтүү бийлик органдары парламенттик шайлоону өткөрүү үчүн бардык добуш берүү тилкелеринде талаптагыдай шарттарды камсыздаган. Ош облусунда жалпы 8 округ, 511 шайлоо тилкеси жана 811 миң 906 шайлоочу бар", - деп белгиленген маалыматта.

Учурда жалпы 461 талапкер ат салышууда. Кыргызстанда 30 шайлоо округу түзүлгөн. Шайлоочулар талапкерлердин бирөөсүнө гана добуш бере алат. Ал эми ар бир округдан үчтөн депутат шайланып келет. Жалпысынан парламент 90 депутаттан турат.

Айта кетсек, шайлоо участкалары жергиликтүү убакыт боюнча саат 20:00 гө чейин иштейт.