Президент өлүм жазасын киргизүү боюнча сунушту Конституциялык сотко жөнөттү

Конституциялык сот мамлекет башчысынын "Кыргыз Республикасынын Конституциясына өзгөртүүлөрдү киргизүү жөнүндө" мыйзам долбоорун кароого жана ага расмий корутунду даярдоого арналган сунуштамасын кабыл алды.

Соттон маалымдашкандай, мыйзам долбоорунда Баш мыйзамдын 25-беренесинин 1-бөлүгүнө түзөтүү киргизүү каралууда. Бул түзөтүү балдарга карата сексуалдык мүнөздө жасалган өзгөчө оор кылмыштарга, ошондой эле зордуктоо менен коштолгон адам өлтүрүүгө байланыштуу учурларда жазанын өзгөчө чарасы катары өлүм жазасын колдонууга мүмкүнчүлүк берүү максатын көздөйт.

Тиркелген материалдарда белгиленгендей, мындай демилге акыркы жылдары балдарга жана аялдарга каршы жасалган өзгөчө оор кылмыштардын көбөйүшүнө жооп катары сунушталууда. Өкмөт бул кадам аркылуу алардын конституциялык жана укуктук жактан корголушун күчөтүүнү көздөйт.

Президент Конституциянын 116-беренесинин 4-бөлүгүнө ылайык, Конституциялык соттон мыйзам долбоору боюнча расмий корутунду берүү өтүнүчүн жолдогон.