Ош облусунун жаңы башчысы эмгек жамаатка тааныштырылды

Бүгүн, 3-декабрда президенттин Ош облусундагы ыйгарым укуктуу өкүлү болуп жаңы дайындалган Аманкан Кенжебаев эмгек жамаатка тааныштырылды. Маалыматты өкүлчүлүктөн билдиришти.

Жаңы жетекчини жамаатка министрлер кабинетинин төрагасынын биринчи орун басары Данияр Амангелдиев тааныштырды. Иш-чарага Ош шаарынын мэри, аппарат кызматкерлери, район акимдери, ошондой эле облустук мекеме-ишканалардын жетекчилери, аксакалдар катышты.

Амангелдиев аймактарда мамлекеттик саясатты натыйжалуу ишке ашырууда өкүлчүлүктүн маанилүү ролу бар экенин, калк менен тыгыз иш алып баруу жана президенттин тапшырмаларын так аткаруу зарылдыгын баса белгиледи. Ал бул жаатта Кенжебаевдин тажрыйбасы бар экенин айтып, ага жаңы кызматында ийгилик каалады.

Жолугушууда буга чейин Ош облусун башкарып келген Элчибек Жантаевдин кызматтык ишинде мамлекеттик органдардын ишмердүүлүгүн координациялап, райондорго үзгүлтүксүз чыгып, калк менен тыгыз байланышта болуп, социалдык жана инфраструктуралык маселелерди чечүүгө өзгөчө көңүл бурганы үчүн жогору бааланды. Ошондой эле Жантаевге “Ош облусунун ардактуу атуулу” наамы ыйгарылды.