Жолдошунан өч алуу үчүн балдарын сабаган келин кармалды

Жолдошунан өч алуу үчүн балдарын сабаган келин кармалды. Окуя Сокулук райондук милициясына катталып, тергөө башталганын Чүй ОИИББинин басма сөз кызматы билдирди.

Айта кетсек, интернет желесинде жолдошун сөгүп, уулу менен кызын сабап жаткан келиндин видеосу тарады.

Текшерүү учурунда аялдын жана балдардын өздүгү аныкталды. Алар Сокулук айылынан 1995-жылы туулган М.А., анын күйөөсү 1988-жылкы Н.М. аттуу жарандар экендиги аныкталды. Сабалган балдарынын бири 9, экинчиси 7 жашта.

Бул факт боюнча Жазык кодексинин 138-беренеси (Ден соолукка оор зыян келтирүү) жана 139-беренеси (Ден соолукка анча оор эмес зыян келтирүү) менен кылмыш иши козголду.

Тергөөдө окуя 26-ноябрда болгондугу, аял күйөөсү менен пикир келишпестикте жүргөн учурда балдарын сабаганы аныкталды. Келин убактылуу кармоочу жайга киргизилди.

Тергөө иштери уланууда.