Жылдын мыкты улакчысы ким? Бишкекте "Улуттук спорт мыктылары" аныкталууда (видео) 

Дене тарбия жана спорт мамлекеттик агенттигине караштуу Спорттун улуттук түрлөрү боюнча дирекция тарабынан бүгүн, 4-декабрда "Улуттук спорт мыктылары 2025" аттуу иш-чара өтүүдө.

Иш-чарага мамлекеттик ишкерлер, спортчулар жана аларды колдоп келген күйөрмандар катышууда.

Дирекция тарабынан уюштурулуп жаткан жыл жыйынтыктоочу иш-чара алгачкы ирет өтүүдө. Салтанаттуу иш-чара жыл мыктыларынын кызыл килемден өтүүсү менен башталды.

Жалпысынан 17 номинация бар. Алар:

• Ордо боюнча жылдын мыкты оюнчусу;
• Тогуз коргоол боюнча жылдын мыкты оюнчусу;
• Эр эңиш боюнча жылдын мыкты балбаны;
• Кыргыз күрөш боюнча жылдын мыкты балбаны;
• Алыш бел боо күрөшү боюнча жылдын мыкты балбаны;
• Улуттук спорт боюнча жылдын мыкты балбан кызы;
• Көк бөрү боюнча жылдын мыкты улакчысы;
• Көк бөрү боюнча жылдын мыкты аргымагы;
• Көк бөрү боюнча жылдын мыкты командасы;
• Кулатуу боюнча жылдын мыкты мушкери;
• Жылдын мыкты жаачысы;
• Улуттук классикалык күрөш боюнча жылдын мыкты балбаны;
• Улуттук спорт түрүнөн жылдын мыкты машыктыруучусу;
• Улуттук оюндар боюнча жылдын мыкты федерациясы;
• Аламан ат чабыш боюнча жылдын мыкты күлүгү;
• Ат чабыш боюнча жылдын мыкты саяпкери;
• Ат чабыш боюнча жылдын мыкты чабандеси.

Добуш дирекциянын Инстаграмдагы баракчасы аркылуу жана түз эфирде берилди. Учурда мыктылар аныкталып, аларга сыйлыктар тапшырылууда.