Бишкекте жигитти байлап алып токмоктогон адам атасы болуп чыкты

Бишкек шаардык ички иштер башкы башкармалыгы токмоктолгон жигиттин окуясы боюнча маалымат берди.

Шаардык милиция окуя Айтматов менен Москва көчөлөрүнүн кесилишинде болгонун, факты каттоого алынып, териштирүү иштери жүгөнүн белгиледи. Натыйжада жигитти урган адам анын атасы болуп чыккан.

Үй-бүлөдө баланын ден соолугуна байланыштуу көптөн бери түшүнбөстүк болуп келген. Ата-эне уулун ооруканага жаткырууга бир нече ирет аракет кылган, бирок жигит каршылык көрсөтүп жүргөн.

Борбор калаанын милициясы үй-бүлөнүн өтүнүчүн эске алуу менен башка маалымат берилбей турганын кошумчалады.

Буга чейин социалдык тармактарда түндө 1 жигитти байлап, аны уруп жатышкан жарандар тартылган видео тараган. Ошондой эле кадрдан окуя болуп жаткан жерден Кайгуул кызматынын унаасынын токтобой өтүп кеткенин көрүүгө болот. Милиция окуянын катышуучуларын издөө иштери жүрүп жатканын кабарлаган.