Өкмөт "Социалдык ипотека" аркылуу майыптыгы бар 258 жаран үй алганын билдирди

Министрлер кабинетинин төрагасы Адылбек Касымалиев 4-декабрда майыптыгы бар адамдардын иштери боюнча кеңештин жыйынын өткөрдү. Ага мамлекеттик жана муниципалдык органдардын жетекчилери, өкмөттүк эмес уюмдардын өкүлдөрү катышты.

Касымалиев Кыргызстанда майыптыгы бар адамдардын саны 2007-жылга салыштырмалуу 221 миң адамга (калктын 3 пайызы) чейин өскөнүн белгилеп, мамлекеттик колдоонун күчөтүлгөндүгү жөнүндө айтып берди.

"2022-жылдан тарта социалдык жөлөк пулдардын өлчөмү эки эсеге көбөйтүлдү. 2025-жылга республикалык бюджеттин долбоорунда бул максаттарга 8,6 миллиард сом каралган. Ошол эле учурда жөлөк пулдун орточо өлчөмүн (6411 сом) жашоо минимумунун деңгээлине жеткирүү пландаштырылууда. Ушул жылы майыптык боюнча пенсияларга 7,6 миллиард сом багытталган, анын орточо өлчөмү 9 600 сомго жетти",- деп белгиледи министрлер кабинетинин башчысы.

Анда муктаж жарандарга зарыл жардам көрсөткөн 14 730 адамды туруктуу эмгек акы менен камсыз кылган жеке жардамчылар институтунун натыйжалуу иштеп жаткандыгы баса белгиленди. Маалымдалгандай, "Социалдык ипотека" программасы боюнча 258 үй-бүлө турак жай менен камсыздалды.

Андан ары майыптыгы бар адамдарды колдоо боюнча мамлекеттик саясат, "Жеткиликтүү өлкө" программасын ишке ашыруунун жыйынтыктары, инклюзивдик билим берүүнү өнүктүрүү жана Чүй облусунда жашоо сапатын жогорулатуу боюнча негизги баяндамалар угулду.

Жыйындын соңунда өкмөт башчы бардык айтылган сунуштарды жана маселелерди камтыган протоколдук чечимдин долбоорун даярдоону тапшырды.