Президент Садыр Жапаров тууралуу китеп жарык көрдү

Бүгүн, 5-декабрда Улуттук илимдер академиясында саясат таануу илимдеринин доктору, профессор Жумагул Сааданбековдун “Президент Садыр Жапаров – Жаңы Кыргызстандын жаратманы” аттуу китебинин бет ачары өттү. Бул тууралуу Агартуу министрлиги билдирди.

Иш-чарага мамлекеттик катчы Арслан Койчиев, президенттин кеңешчиси Марат Иманкулов, агартуу министри Догдуркүл Кендирбаева, академиктер жана коомдук ишмерлер катышты.

“Лидерлер басып өткөн жолу, күчтүүлүгү, эрктүүлүгү менен айырмаланат. Сиздин илимий-далилдүү фактылар менен жазылган бул китебиңиз абдан таң калтырды. Сиз Кыргызстандын басып өткөн тарыхын, экономикасын талдап бердиңиз. Жаштар лидерлердин ишин, жашоосун жакшы билүүсүнө мыкты курал экен”,- деди Кендирбаева.

Белгилей кетсек, китепте президент Садыр Жапаровдун балалык жана өспүрүм кезинен тартып, өз алдынча жасаган алгачкы кадамдары, мамлекетти башкаруунун оптималдуу моделин издөө жолу, жүргүзгөн реформалары жана жетишкендиктери тууралуу баяндалат.